Egian Egiaz

Egian Egiaz-en urteurrena. Mila esker Blogak Zerotik.

freaknumber2_ — Sun, 02 Dec 2007 11:15:04 +0000

Bada urte bat Egian Egiaz sortu genuela. Eta gaurko honetan, urtemuga honetan, Egiako Atari honen Genesiaz jardungo gara.

Urte bat bada Blogak Zerotik kurtsora joan ginela, blog egoki bat nola egin erakutsi zigun ikastaro bat. Hura Galder Segurola-ren eskutik etorri zen, lagun on bat. Azaldu zizkigunak idatzi egin zituen gero eta bere blogera igo zuen ikastaroa, beste pertsona batzuek ere hartaz baliatu zitezen (hura ikusteko klik egin hemen). Ikastaro hura, Aberrigintzan Kultur Taldeak subentzionatu zuen, haiei ere eskerrak eman nahi dizkiegu hemendik.

Zaila da, benetan, blog bat modu konstante batean berrituta edukitzea. Denbora behar da, gai interesgarri eta mamitsuak behar dira. Hori da Egian Egiaz-ek azken urte honetan erakutsi diguna. Baina horrek ez du, inola ere, esan nahi esperientzia desegokia izan denik. Alderantziz, auzo bati buruzko blog bat edukitzean, hari buruzko ikuspegia guztiz aldatzen da, auzoko bizitza aztertu eta erakusten saiatzen zarelako. Horregatik, eskerrak eman nahi dizkiogu Galder Segurola-ri mundu berri honetan, Web 2.0 mundu honetan, lehen pausoak ematen laguntzeagatik.

Mila esker ere zuei, irakurleoi urte honetan Egiako errealitatea gurekin konpartitu duzuen horiei. Mila esker, benetan. Eta zorionak Blogak Zerotik. ZORIONAK!

Babel eta Igogailua II

freaknumber2_ — Mon, 05 Nov 2007 11:44:02 +0000

Iturria: Irutxuloko Hitza

Orain dela denbora asko, urte bat ia, Egia auzoko blog honetan hitz egin genuen Plaza Haundiko Igogailuaren inguruko gorabeherei buruz. (Ikus: Babel eta Igogailua). Urte bete da, jada, obrak hasi zirela, Udalak lau hilabete eta erdian bukatuta egongo zela esan zuen arren. Orain dioenez, 2008. urte hasierarako bukatuta egongo dira, obrak hasi eta 15 hilabetetara.

Hasieratik arazoak izan zituzten obrak egiteko garaian, lehenik, plazaren azpian dauden garajeen jabeen arteko liskar eta auziak izan ziren; gero Dandai Egiako Emakume Elkarteak igogailua kristalezkoa –gardena– izatea eskatu zuten, segurtasun handiagoa edukitzeko. Igogailuak Plaza Haundi eta Kapitañene lotu ditu, eta luzera, pasagune baten bitartez Baztanekin lotura izango du.

Egian Egiazek adierazi nahi du, Udalak errespetua zor diola Egiari egiten ari den obra guztiek ez diotelako onurarik ekartzen auzoari. Udalak ez ditu epeak errespetatzen eta konpondu nahi dituen arazoak gehiago okertzen ditu. Edo ez da hala?

Le Bukowski

freaknumber2_ — Mon, 15 Oct 2007 09:52:50 +0000

Itzuli da. Bukowski itzuli da. Aste batzuk badira Bukowski taberna berriro ireki zela. Egin genuen, Egian Egiaz blog honetan taberna mitiko honi buruzko omenaldi-idazki bat. Hura: Bukowskiren Memorian artikuluan irakur dezakezue. Baina orain itzuli egin da, Egia Kaleko 18an dagoen musika ikonoa itzuli egin da.
Aurpegia garbituta dauka, izena aldatuta: Le Bukowski. Musika Kluba. Baina betiko izpiritua mantendu egiten du. 2005ean eraikina eraberritu nahi izan zuen enpresa jabeak eta Josu Urrutiak eta bere lankideek ez zekiten bere lan kuttunarekin jarraitu ahal izango zuten edo ez. Urrutiak aurrera pausu bat eman zuen orduan, eta lokala erosi zuen guztiz eraberritzeko.
Berritasunen inguruan, bazkaltzeko eta afaltzeko tokia dago orain tabernan, eta musika taldeek, jada, ez dute pista erdian jo beharko, orain eszenatoki eder bat izango dute.

Bestalde, web orrialde bat osatzen ari dira: lebukowski.com Guk, gure aldetik, blog-ean linkatuko dugu orrialdea. Eta zuei tabernatik zerbait hartzea gomendatzen dizuegu. Itzuli da. Bukowski itzuli da!

Arrtikulua hau gaztelaniaz irakurri nahi baduzu sakatu hemen.

Abertzale.eu-ren Jaiotza

freaknumber2_ — Tue, 14 Aug 2007 14:06:56 +0000

Pasa den ostegunean, abuztuak 8, buletin digital berri bat jaio zen: Abertzale.eu. Blog horrek, indetependentismotik eta ezkerretik beste Euskal Herri baten eraikuntza izan daitekela dio.

Egian Egiazetik zortea izan dezatela espero dugu.

20 urte badira…

freaknumber2_ — Mon, 30 Jul 2007 14:45:34 +0000

2 hilabete badira Egia gure auzoko blog hau berritzen ez dugula. Halere, 20 urte ere badira LA TABERNA taberna -eta barkatu erredundantzia- ireki zela. Horregatik, blog umil honetatik ospakizunera gehitu nahi gara.

Egiako toki esanguratsua da LA TABERNA, garagardo on batekin musika ederra entzuteko leku apropos baino aproposagoa. Bere jabeari buruz, Alfredori buruz, esan genezake auzoko erreferente dela. Jazz emanaldien sustatzaile porrokatua da, eta edaritegia, bere gustoen eta auzoko kulturaren erakusleiho paregabea.

Orain, urtemuga ospatzen da eta edaritegiak kamiseta batzuk atera ditu hura ospatzeko asmoarekin.

Ez du inork duda egiten, LA TABERNA Egiako txoko berezi eta apartekoa da. Egian Egiazetik beste 20 urteko zortea opa diogu. ZORIONAK!

Gaztelaniazko bertsioa irakurri nahi badezue sakatu hemen.

Hauteskunde Eguna

freaknumber2_ — Mon, 28 May 2007 20:31:56 +0000

Atzo gauzatu ziren, Euskal Herri osoan bezala, Donostiako Udalerako hauteskundeak. Irabazlea PSOE izan genuen, baina gure blog hau Egia auzoari dagokionez, gure auzoko emaitzak jarriko ditut:

PSOE: 2342

ANV: 1341

PP: 982

PNV: 818

EB-ARALAR: 734

EA: 437

Artikulu hau gaztelaniaz irakurri nahi baduzu, sakatu hemen.

Egia EgitEA

freaknumber2_ — Mon, 21 May 2007 09:32:52 +0000

Lehengoan, Egia gure auzotik paseoan nenbilenean, Eusko Alkartasunako udaleko hautagaiak aurkitu nituen. Han zeuden, Jaione Arratibel, Ricardo Burutaran eta Harkaitz Millan, besteak beste. Haien alderdiko Egiako hauteskunde programa banatzen ari ziren. Bi gauza iruditu zitzaizkidan harrigarri. Lehena, auzokako programa izatea. Bigarrena, haiek hura banatzen aritu izana. Lan gogorra, euria baitzen.

Benetan konpromisoa harturiko hautagaiak, kalean, guztiz blaiturik programak banatzen. Horregatik, lana eta Egiarekiko programa bat egitean erakutsi duten borondate ona eskertzeagatik, programaren ildo nagusiak hementxe atxikituko ditut.

EGIA BERRESKURATU lelopean, hau da proposatzen dutena:

-Aldakonea eta Ametzagaina bezalako auzoko guneek duten irisgarritasun arazoak konpontzea.
-Deba Ibaia, Oiartzun Ibaia eta Konkorrenea ingurunetan berrurbanizazio eta berritzeak egitea.
-Ibaialde gunean ibai parkea eraikitzea. Ibaialden, Quirón azpian, aparkamendua ipintzea.
-Tabakalerako proiektuaren berdefinizioa, auzorako erabilera izango duten gune kulturalak bultzatuz.
-Tabakaleran Emakumearen Zentrua ezartzea.
-Egiako zubia kendu eta berri bat ipintzea.
-Egiako lur azpiko pasadizua kendu eta oinezkoentzako pasarela bat eraikitzea.
-Tabakalera eta Mundaiz arteko bidea konpontzea, trafikoa berrantolatuz.
-Jareñoko liburutegia handitzea, bertako ekintza ezberdinak zabaltzea eta ordutegiak berdefinitzea.
-Polikiroldegiko instalakuntzak hobetu eta berritzea.
-Udaltzaingoaren presentzia handitzea, Ertzaintzarekin koordinatuz.

Artikulu hau gaztelaniaz irakurri nahi baduzu sakatu hemen.

Euskal Herria EgitEA

freaknumber2_ — Mon, 14 May 2007 16:10:02 +0000

Hauteskundeak hasi dira. Nabaritu duzue, ezta? Buzoiak Odonen panfleto eta sasi-aldizkariez beterik. Geure diruarekin egindako panfletoak. Kanpainian gaude, nabari da. Haizeak daramatza esames asko, gehiegi agian.

Orain Eusko Alkartasunak kanpainiarako egin duen bideo batekin utziko zaituztet. Bideo oso interesgarria:

Artikulu hau gaztelaniaz irakurri nahi baduzue sakatu hemen.

Espaloi txikia. Espaloi handia.

freaknumber2_ — Tue, 17 Apr 2007 15:01:49 +0000

Bukatu dira Aste Santua eta Pazkoko Astea. Bukatu dira oporrak. Denok hasi gara berriro lanean. Eta gu bezala, udal-langileak ere lanean hasi dira. Eta zein lan dute oraingoan? Karmengo Amaren kaleko espaloia handitzea.

Astelehenean ikusi nuen lehen aldiz lurrean, espaloia bitan bereizten zuen marra eten bat. Gero jakin nuen, marra hura hesi batzuen kokalekua markatzen zutela.

Orain errepidetik hurbilen dagoen zatia altxa egingo dute eta zabaldu. Honek arazoak sortzen ditu. Espaloiko pasabidea estutu egin da. Benetan estua da orain, bi pertsona gurutzatzen direnean talka egiten dute erremediorik gabe. Bigarren arazoa, espaloia zabaltzean, errepidea estuagoa izango da, ondorioz ezingo dira kotxeak aparkatu lekurik ez delako egongo.

Agian, Odon Elorza, Donostiako alkateak aparkatzeko leku falta hori San Frantzisko Javier kalean egin nahi diren parking-arekin konpentsatu egin nahiko du? Ez dut uste. Milioiak balio baidute han egindako aparkalekuek. Beraz, Egia gure auzoan, kotxeak uzteko lekua falta, eta gainera espazioa murriztu, ibiltariei traba eginaz. Nola ez.

Sarrera hau gaztelaniaz irakurtzeko emen sakatu.

Egian Egiaz Elebidun!

freaknumber2_ — Wed, 11 Apr 2007 13:51:27 +0000

Bai, hala da. Gaurtik aurrera Egia auzoko blog hau elebiduna izango da, euskaraz eta gaztelaniazko bertsioak izango ditu. Beharrezkoa ikusten genuen irakurleei gaztelaniazko aukera bat ematea. Ildo horretatik, Wordpressekin gaztelaniazko bertsioa eraiki dugu. Ez da erraza izan eta arazoak izan ditugu eta. Horregatik, gure lagun on Galderri eskerrak eman nahi dizkiogu, eskaini eta emandako laguntzarengatik. Egian Egiaz ezerezean geldituko zen laguntza hori eman izan ez baligu.

Batetik, ikusiko zenutenez blogaren burualdeko barran, azken botoia gaztelaniazko bertsiora eramango zaituztena da: Egian Egiaz en Castellano. Bestetik, hemendik aurrera, sarrera berri guztiek gaztelaniazko bertsiorako lotura zuzena izango dute haien amaieran.

Hala ere, modu zuzenean sartu nahi baldin baduzue gaztelaniazko bertsiora, URLan hauxe ipini: www.cas.egiaz.net

Artikulu honen gaztelaniazko bertsioa irakurri nahi baduzu hemen sakatu.